سيلفى

ولو سيلفى.. ولو غيره
صوركم حلوه ف عينينا
وكل حبيب يشوف طيره .. ويستنّاه على المينا ..
يشاور ليِه.. ويختاره..
يمد اديه.. يحط الحِمل عن كتفه .. على كفّه،
ويحكي في البعاد ناره.. ويجرى عليه..
كإنه الروح وردّت له
ومهما الدنيا ودّت له من الأفرح
يكون مشتاق غناوينا
ويبعتله فى نظرة شوق ..
صباح الخير
ياسيد الناس.. هترجع إمتى وتجينا
تمدّ الروح فى تصاوريكْ ..نوفّيلك..
ولا يكفينا م الدنيا دى غير طلّه علي قلوبنا ..
هترضينا
ولا سيلفى ولا غيره
ده خير القلب من خيره
وكل حبيب يشوف طيره.. ويستنّاه على المينا ..

هبـــة