الاثنين، 22 نوفمبر 2010

مدوناتى من العاميه ..{ ست البنات }



سـت البنــات

ست البنــــات (( كتبت سنة 1999))
يعنى القصيده دى عمرها 14 سنه
باللهجه العاميه المصريه (( من ديوان جنونيات عاقله جدًا))
ـــــــــــــــــــــــــــــــــــــــــــــــــــــــــــــــــــــــــــــــــ
مش هاموت..
لو حلم من أحلام حياتى
مـرّه مات

مش هـ دوّر
جـوّه قلبى
عن صحيفــة ذكريــات

مش راح اكتب فى قصيدتـى
كلّ أبيات الأهـات

عمرى م أنسى
إنّ حلمى
إنّى أكون..
ست البنــات

مش هامــوت لو حلم مـات

أيــوه .. حلمى هـ احلمه
وأرسمـه
بشكله الجديــد

والقصيــده راح تلاقى
جـوّه منـّى
ألف عيــد

من هزيمتــى معـاك ف يـوم
هاصنـع النصـر الأكيــد

والجـراح هـ تصير هالات
مش هامـوت لو حلم مات

مش راح أنسـى
إنّ حلمى
إنى أكـون
ســت البنــات

أيـّوه
فـيّـا الكبريـاء ..
ويّا البراءه والصفـاء

والحنين الاخضرانى
والدلع ويّـا الحيــاء

مش راح أنـدم
ع الّلى ضاع
مش راح أقبل فيه عزاء

عمرى م اقبل بالفُتات
مش هاموت
لو حلم مـات

مش هاعيش العمر كله
للبكا أو للنحيب

لأ.. دوايا مش ف إ يـدك
دا المريض جواه .. طبيب

والّلى شوفته معاك ف يوم
هـوّه حبّه م النصيب

لسّـه للدنيـا حكايـات
مش هاموت لو حلم مـات

الدمـوع غسلت جـراحى
طيّبت كل الآلام ..

والآلام منـّها إصطباحى
بالرضا ..
ودا مش كلام

والنهـايه ..
انـّى أكـون
مش حكايه والختــام

والسـلام جـوايـا بــات
مش هاموت .. لو حلم مـات

مش راح انسى
إن حلمـى انّ اكون
سـت البنــات
ــــــــ
شـعـــر/ هـبــه عبــد الـوهــاب