ضمّينــى..

ضمينى ..
___________

لمّينى ..
جوه أحضانك
وضمّينى
لو إسمى تــاه ف أغصانك
تِسَمّينى ..
وتاخدينى بعيــــد عنّى
ياللّى ف وجودى نور منّك
وانتى ف وجودك نور منّى ..
أو حتّى نــار
يالّلى ف هواكى
بندوق حلاوة الانتصار
***
يا بنت الليل وتسبيحه
ومنّك فجرى تصبيحه
وفيكى الصبح .. صار ضحكه
تلمّ الشوك وتجريحه
لمحت الطُهر ف عنيكى
على غصن الحنين داير
رسمت الفرح دار بيكى ..
لقيتك طفله بضفاير
فغنيتك ..
وغنّى الضى ويـايا
فضميتك
لصوره بشوفها ف مرايه
لقيت الروح بتهوانى ..
وحبيتك
لقيتك دنيا جوايا
بتحيينى
ودابت فيكى أحزانى
م تاخدينى
ف توبك يالله واحمينى
ولفّينى ف أوراقك
وهانسانى
وتنسينى
ولمّا أرجع ..
هـ ارفرف فوق ميادينك
ولمّا أتعب
راح أفرش شال على جبينك
هـ ا نام وارتاح على شطك
وهأتمدد
ولمّا أبرد ..
تغطينى.. تدفينى رياحينك
ولو روحى تجبلك نصر ..
فلا يمكن.. أنا اتردد
يا همس الروح ف تكوينى
م تاخدينى ..
ولمّينى ف أحضانك ..وضمّينى
وان إسمى تاه ف أغصانك ..
تسمّينى ..
_____
هبه عبد الوهاب